Førjulskonsert med harpe og fiolin

Førjulskonsert med harpe og fiolin Den norsk-nederlandske duoen Duo Janse-Robak oppstod for eit par år sidan etter nokre orkesterprosjekt der begge spelte. Det førte til ein liten turné i Møre og Romsdal og Sogn og Fjordane i fjor vår. Dette var noko dei gjerne vil halde fram med når dei er same stad til same tid. På konserten vil du få høyre vakre tonar frå to instrument som passar veldig godt ilag, men som merkeleg nok sjeldan er å høyre saman som duo.  Miranda Janse er frå Nederland. Ho held til dagleg til i Rotterdam og spelar konsertar i inn- og utland og har spelt med ulike orkester og ensemble i Nederland, Slovakia og Noreg både som orkestermusikar og som solist. Dei siste åra har ho fått fleire og fleire oppdrag i Noreg.  Øyvind Skatvedt Robak er fiolinist og bandoneónist som bur i Volda. Han har tango som spesialfelt i tillegg til klassisk musikk, men er ikkje framand for å prøve ut nye ting. Han har personleg og musikalsk bakgrunn frå Uruguay, (som saman med Argentina er der tangoen oppstod), og han vart utdanna i Trondheim og Paris, i tillegg til å ha gått i lære hjå fleire av dei største tangomusikarane i Argentina. Øyvind har hatt mange oppdrag i inn-og utland, og mellom anna spelt ei rekkje konsertar med tango og kammermusikk i Noreg, Uruguay, Argentina, Danmark, Tyskland, Frankrike mm. Dei seinare åra, etter han slo seg ned i Volda, har han vorte flittig nytta i regionen og spelar jamnleg i Operaen i Kristiansund, Opera Nordfjord og andre orkester i tillegg til ein god del kammermusikk i området.